ठाकरेंच्या खासदारांमध्ये फुट पडणार? अनिल देसाई की अरविंद सावंत, कोण जाणार?

महाराष्ट्राच्या राजकारणात पुन्हा एकदा मोठ्या भूकंपाची चर्चा सुरू झाली आहे. शिवसेना (उद्धव बाळासाहेब ठाकरे) पक्षातील खासदारांच्या संभाव्य फुटीच्या बातम्यांनी राजकीय वर्तुळात खळबळ उडवली आहे. गेल्या काही दिवसांपासून ठाकरे गटातील 9 पैकी 6 ते 7 खासदार एकनाथ शिंदे यांच्या शिवसेनेत जाणार असल्याच्या चर्चांना उधाण आले होते. आता या चर्चांना आणखी बळ मिळालं आहे.

या पार्श्वभूमीवर दक्षिण मुंबईचे खासदार अरविंद सावंत यांनी लोकसभा अध्यक्ष ओम बिर्ला यांना पत्र लिहिल्याची माहिती समोर आली आहे. त्याचवेळी काही खासदारांनीही बिर्ला यांच्याकडे भेटीसाठी वेळ मागितल्याची चर्चा आहे. त्यामुळे दिल्लीतील राजकीय हालचालींना वेग आला असून, 'ऑपरेशन टायगर' पुन्हा चर्चेत आले आहे.

दरम्यान, शिवसेना शिंदे गटाचे आमदार नरेंद्र भोंडेकर यांनी एबीपी माझाशी बोलताना मोठा दावा केला आहे. त्यांनी म्हटलं की, उद्धव ठाकरे यांच्या पक्षातील सर्व लोकसभा खासदार आमच्या संपर्कात असून फक्त एक खासदार वगळता बाकी सर्व जण भविष्यात शिंदे गटात सहभागी होतील. मात्र तो एक खासदार नेमका कोण असेल? अरविंद सावंत की अनिल देसाई? याबाबत भोंडेकर यांनी कोणतेही स्पष्ट उत्तर दिले नाही.

भोंडेकर यांनी ठाकरे गटाच्या नेतृत्वावरही टीका केली. लोकप्रतिनिधींच्या अडचणी समजून घेण्यात पक्ष नेतृत्व अपयशी ठरल्याचा आरोप त्यांनी केला. पक्षात आमदार-खासदारांना स्वातंत्र्य नसल्याने आणि नेतृत्वाशी थेट संवादाची संधी मिळत नसल्याने अनेक लोकप्रतिनिधी नाराज असल्याचा दावा त्यांनी केला. याउलट एकनाथ शिंदे यांच्याकडे सर्वांना मोकळेपणाने काम करण्याची संधी मिळते, असेही ते म्हणाले.

सध्या उद्धव ठाकरे यांच्या पक्षाकडे लोकसभेत 9 खासदार आहेत. त्यामध्ये अनिल देसाई, अरविंद सावंत, संजय दिना पाटील, राजाभाऊ वाजे, संजय जाधव, संजय देशमुख, नागेश पाटील आष्टीकर, ओमराजे निंबाळकर आणि भाऊसाहेब वाकचौरे यांचा समावेश आहे.

यापैकी संजय जाधव, संजय देशमुख, नागेश पाटील आष्टीकर, ओमराजे निंबाळकर, भाऊसाहेब वाकचौरे आणि संजय दिना पाटील हे खासदार शिंदे गटाच्या वाटेवर असल्याची चर्चा राजकीय वर्तुळात रंगली आहे. मात्र संबंधित खासदारांकडून अद्याप अधिकृत भूमिका स्पष्ट करण्यात आलेली नाही.

दरम्यान, खासदारांना पक्षांतरासाठी मोठ्या आर्थिक ऑफर दिल्या जात असल्याचा आरोप खासदार संजय राऊत यांनी सोशल मीडियावर केला आहे. त्यामुळे या संपूर्ण प्रकरणात राजकीय आरोप-प्रत्यारोप आणखी तीव्र झाले आहेत.

जर ठाकरे गटातील मोठ्या संख्येने खासदार शिंदे गटात गेले, तर तो उद्धव ठाकरे यांच्यासाठी आणखी एक मोठा राजकीय धक्का ठरू शकतो. मात्र या चर्चांमध्ये किती तथ्य आहे आणि प्रत्यक्षात किती खासदार पक्षांतर करतात, याचे उत्तर येत्या काही दिवसांत मिळणार आहे. त्यामुळे महाराष्ट्राचे राजकारण पुन्हा एकदा निर्णायक वळणावर येऊन ठेपले आहे.