नाशिक पदवीधर मतदारसंघातील विजयांनंतर गोकुळ गितेंच्या पुढील राजकीय वाटचालीकडे राज्याचे लक्ष

नाशिक पदवीधर मतदारसंघाच्या निवडणुकीत अपक्ष उमेदवार म्हणून विजय मिळवणारे गोकुळ गिते आता भाजपऐवजी मुख्यमंत्री उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करणार असल्याच्या चर्चांना जोर आला आहे. या घडामोडीमुळे नाशिकच्या राजकारणात नव्या समीकरणांची चर्चा रंगली असून महायुतीतील अंतर्गत राजकारण पुन्हा एकदा चर्चेचा विषय बनले आहे.

राज्यात नुकत्याच पार पडलेल्या विधानपरिषद निवडणुकीत महायुतीने दणदणीत यश मिळवले. एकूण ११ पैकी १० जागांवर महायुतीचे उमेदवार विजयी झाले, तर एका जागेवर अपक्ष उमेदवाराने बाजी मारली. महाविकास आघाडीला मात्र एकही जागा मिळवता आली नाही. या निवडणुकीपूर्वी ‘ऑपरेशन टायगर’, पक्षांतराच्या चर्चा आणि काही ठिकाणी झालेली बंडखोरी यामुळे राजकीय वातावरण चांगलेच तापले होते.  

बंडखोरी करूनही विजय; गोकुळ गितेंनी सिद्ध केली ताकद

नाशिक पदवीधर मतदारसंघात महायुतीकडून शिंदे सेनेचे नरेंद्र दराडे यांना अधिकृत उमेदवारी देण्यात आली होती. मात्र भाजपशी संबंधित मानले जाणारे गोकुळ गिते यांनी आपला उमेदवारी अर्ज मागे घेण्यास नकार दिला. पक्षाच्या भूमिकेपेक्षा स्वतःच्या जनाधारावर विश्वास ठेवत त्यांनी अपक्ष म्हणून निवडणूक लढवली.

निवडणुकीच्या प्रचारादरम्यान गिते यांनी वारंवार “मतदार आमच्या पाठीशी आहेत” असा दावा केला होता. निकालानंतर त्यांचा हा दावा खरा ठरला आणि त्यांनी विजयाचा गुलाल उधळत आपल्या राजकीय ताकदीची प्रचिती दिली. त्यांच्या विजयामुळे नाशिकमधील पारंपरिक राजकीय समीकरणांनाही धक्का बसल्याचे मानले जात आहे. 

शिंदेंच्या शिवसेनेकडे झुकतं पारडं?

विजयानंतर गोकुळ गिते कोणत्या राजकीय पक्षासोबत जाणार, याबाबत उत्सुकता निर्माण झाली आहे. सुरुवातीला त्यांच्या भाजपमध्ये पुनरागमनाची चर्चा होती. मात्र आता ते एकनाथ शिंदे यांच्या शिवसेनेत प्रवेश करण्याच्या तयारीत असल्याची माहिती राजकीय वर्तुळात चर्चिली जात आहे.

सूत्रांच्या माहितीनुसार, उद्योगमंत्री उदय सामंत यांच्या मध्यस्थीने गोकुळ गिते आणि एकनाथ शिंदे यांच्यात भेट होण्याची शक्यता आहे. ही भेट झाल्यास त्यांच्या पुढील राजकीय भूमिकेवर शिक्कामोर्तब होऊ शकते. 

नाशिकच्या राजकारणात नवे समीकरण?

गोकुळ गिते यांनी शिंदे गटात प्रवेश केल्यास नाशिक जिल्ह्यातील महायुतीच्या राजकारणात मोठे बदल घडू शकतात. स्थानिक पातळीवरील नेतृत्व, आगामी निवडणुकांची रणनीती आणि पक्षांतर्गत समीकरणांवर त्याचा परिणाम होण्याची शक्यता व्यक्त केली जात आहे.

सध्या तरी गोकुळ गिते यांच्या पुढील निर्णयाकडे नाशिकसह संपूर्ण राज्याचे राजकीय लक्ष लागले असून, त्यांच्या एका निर्णयामुळे महायुतीतील राजकीय गणिते बदलण्याची शक्यता नाकारता येत नाही.