राम मंदिरातील देणगी चोरीवर योगींचा इशारा ५०० वर्षे वाट पाहिली, आणखी १५ दिवस थांबा

अयोध्येतील भव्य राम मंदिरात भाविकांनी अर्पण केलेल्या देणगीच्या कथित चोरीच्या प्रकरणामुळे राजकीय वातावरण तापले असतानाच उत्तर प्रदेशचे मुख्यमंत्री योगी आदित्यनाथ यांनी शुक्रवारी प्रथमच या संवेदनशील विषयावर जाहीर प्रतिक्रिया दिली. अयोध्येतील रुदौली विधानसभा मतदारसंघात विविध विकासकामांच्या लोकार्पण आणि शिलान्यास कार्यक्रमानिमित्त आयोजित जनसभेत त्यांनी या प्रकरणावर भाष्य करत विरोधकांवर जोरदार टीका केली, तसेच रामभक्तांना पारदर्शक तपासाची ग्वाही दिली.

जनसभेला संबोधित करताना मुख्यमंत्री योगी आदित्यनाथ म्हणाले की, राम मंदिरासाठी देशातील कोट्यवधी रामभक्तांनी तब्बल ५०० वर्षे संघर्ष केला आहे. त्यामुळे या प्रकरणात घाईघाईने निष्कर्ष काढण्याऐवजी आणखी १५ दिवस संयम बाळगावा. राम जन्मभूमी तीर्थ क्षेत्र ट्रस्टच्या विनंतीनुसार राज्य सरकारने तात्काळ विशेष तपास पथक (SIT) स्थापन केले असून या प्रकरणाची सखोल चौकशी सुरू आहे.

"एसआयटी या प्रकरणातील 'दूध का दूध आणि पाणी का पाणी' करेल. तपासात कोणताही दोषी आढळल्यास त्याला कोणत्याही परिस्थितीत सोडले जाणार नाही. त्याच्यावर कठोर कारवाई केली जाईल. मात्र या प्रकरणाचा आधार घेत अयोध्या, राम मंदिर किंवा रामभक्तांना बदनाम करण्याचा प्रयत्न कोणीही करू नये," असा इशाराही मुख्यमंत्र्यांनी दिला.

योगी आदित्यनाथ यांनी तपास पूर्ण होईपर्यंत राजकीय आरोप-प्रत्यारोप टाळण्याचे आवाहन केले. कोणाकडेही या कथित चोरीसंदर्भातील कागदपत्रे, पुरावे किंवा अन्य माहिती असल्यास ती थेट एसआयटीकडे जमा करावी, असे त्यांनी स्पष्ट केले. तपास सुरू असताना बेजबाबदार वक्तव्ये केल्यास कोट्यवधी रामभक्तांच्या भावना दुखावल्या जाऊ शकतात, असेही त्यांनी नमूद केले.

या प्रकरणावरून मुख्यमंत्री योगी आदित्यनाथ यांनी समाजवादी पक्षाचे अध्यक्ष अखिलेश यादव आणि काँग्रेसवरही जोरदार हल्लाबोल केला. "जे लोक पूर्वी रामभक्तांवर लाठ्या आणि गोळ्या चालवत होते, ते आज आम्हाला उपदेश देत आहेत. हे तेच लोक आहेत ज्यांनी रामभक्तांचा अपमान केला, रामललाच्या दर्शनालाही विरोध केला आणि अयोध्येला जाणाऱ्या आपल्या आमदारांनाही रोखले," असा आरोप त्यांनी केला.

अखिलेश यादव यांच्यावर निशाणा साधताना त्यांनी सांगितले की, समाजवादी पक्षातील काही नेत्यांनी सर्व आमदारांना अयोध्येला नेण्याची सूचना केली होती, मात्र त्यांना पक्षातून दूर करण्यात आले. "आज तेच नेते आमच्या सरकारमध्ये मंत्री आहेत," असे सांगत त्यांनी विरोधकांच्या भूमिकेवर प्रश्नचिन्ह उपस्थित केले.

काँग्रेसवर टीका करताना योगी म्हणाले की, राम मंदिर उभारणीला विरोध करण्यासाठी काँग्रेसने न्यायालयापासून ते रस्त्यापर्यंत सर्व स्तरांवर प्रयत्न केले होते. प्रभू श्रीरामांच्या अस्तित्वावर प्रश्न उपस्थित करणारी काँग्रेस आता रामभक्तांच्या भावनांचे राजकारण करत असल्याचा आरोपही त्यांनी केला.

दरम्यान, मुख्यमंत्र्यांच्या या वक्तव्यानंतर एसआयटीने तपासाची गती वाढवली असून राम मंदिर ट्रस्टच्या बँक खात्यांची तसेच देणगी कक्षातील सीसीटीव्ही फुटेजची तपासणी सुरू आहे. या प्रकरणाचा अंतिम अहवाल येईपर्यंत राजकीय वर्तुळासह देशभरातील रामभक्तांचे लक्ष या तपासाकडे लागले आहे.