नाशिकात सर्वात मोठा उलटफेर! गोकुळ गितेंचा ‘गनिमी कावा’; नरेंद्र दराडेंचा पराभव करत दणदणीत विजय

राज्यभराचे लक्ष लागून राहिलेल्या नाशिक स्थानिक स्वराज्य संस्था मतदारसंघाच्या विधान परिषद निवडणुकीत अखेर मोठा राजकीय ट्विस्ट पाहायला मिळाला. भाजपचे बंडखोर आणि अपक्ष उमेदवार गोकुळ गिते यांनी महायुतीचे अधिकृत उमेदवार नरेंद्र दराडे यांचा पराभव करत दणदणीत विजय मिळवला. मतमोजणीच्या अखेरच्या टप्प्यात चित्र पूर्णपणे बदलल्याने नाशिकच्या राजकीय वर्तुळात एकच खळबळ उडाली आहे.  

‘माघार’ चर्चांना निकालाने दिले उत्तर

निवडणुकीपूर्वी महायुतीतील वरिष्ठ नेत्यांच्या मध्यस्थीनंतर गोकुळ गिते यांनी उमेदवारी मागे घेतल्याच्या चर्चा रंगल्या होत्या. मात्र तांत्रिकदृष्ट्या त्यांचे नाव मतपत्रिकेवर कायम राहिले होते. निकालानंतर या सर्व चर्चांना पूर्णविराम मिळाला असून गिते यांनी थेट विजयाची मोहोर उमटवली आहे.

एकूण 618 मतदानांपैकी 13 मते अवैध ठरली. त्यामुळे 605 वैध मतांवर निकाल निश्चित झाला. विजयासाठी आवश्यक कोटा 303 मतांचा होता. गोकुळ गिते यांना तब्बल 357 मते मिळाली, तर महायुतीचे उमेदवार नरेंद्र दराडे यांना 248 मतांवर समाधान मानावे लागले. अन्य उमेदवार प्रसाद हिरे यांना एकही मत मिळाले नाही.

मतमोजणी केंद्रावरच विजयाचा दावा

मतमोजणी सुरू असतानाच गोकुळ गिते यांनी केंद्रावर हजेरी लावत आपण शंभर टक्के निवडून येणार असल्याचा विश्वास व्यक्त केला होता. निकालानंतर बोलताना त्यांनी सांगितले की, “मतदारांनी माझ्यावर पूर्ण विश्वास दाखवला आहे. मी वैयक्तिक प्रचार थांबवला होता, मात्र कार्यकर्त्यांनी पार्श्वभूमीवर संपूर्ण यंत्रणा सक्रिय ठेवली होती. मी माघार घेतली नव्हती आणि तो शब्द वापरणे चुकीचे आहे.”  

दराडेंची नाराजी; ‘विश्वासघात’ झाल्याची प्रतिक्रिया

निकालाचे चित्र स्पष्ट होताच नरेंद्र दराडे यांनी मतमोजणी केंद्रातून नाराजीने बाहेर पडत आपला विश्वासघात झाल्याची भावना व्यक्त केली. प्रसारमाध्यमांशी बोलताना त्यांनी, “सध्या मी अधिक काही बोलणार नाही. अंतिम निकाल पूर्णपणे समोर आल्यानंतर सर्व बाबींवर सविस्तर भूमिका मांडेन,” असे सांगितले.

नाशिकच्या राजकारणात नव्या समीकरणांची चर्चा

गोकुळ गिते यांच्या विजयामुळे नाशिकच्या राजकारणात नव्या समीकरणांची चर्चा सुरू झाली आहे. महायुतीच्या अधिकृत उमेदवाराचा पराभव आणि बंडखोर उमेदवाराचा विजय हा केवळ निवडणुकीचा निकाल नसून स्थानिक राजकारणातील बदलत्या शक्तिसंतुलनाचा स्पष्ट संदेश मानला जात आहे. आगामी स्थानिक स्वराज्य संस्था आणि विधानसभा निवडणुकांच्या पार्श्वभूमीवर या निकालाचे दूरगामी परिणाम दिसण्याची शक्यता व्यक्त केली जात आहे.