देवेशचा छोटा अपघात झाला'; पहाटे आईला आला फोन, सत्य समजताच कुटुंबावर कोसळला दुःखाचा डोंगर

शनिवार-रविवारच्या सुट्टीचा आनंद साजरा करण्यासाठी मित्रांसोबत सहलीला गेलेल्या पुण्यातील एका २२ वर्षीय तरुणाचा नीरा देवघर धरणाच्या बॅकवॉटरमध्ये बुडून दुर्दैवी मृत्यू झाल्याची हृदयद्रावक घटना समोर आली आहे. रविवारी पहाटे पोहण्यासाठी पाण्यात उतरलेल्या या तरुणाचा अचानक पाण्यात बुडून मृत्यू झाला. या घटनेमुळे त्याच्या कुटुंबावर दुःखाचा डोंगर कोसळला असून परिसरात हळहळ व्यक्त होत आहे.  

'छोटा अपघात झाला' असे सांगून मित्राने केला फोन

मिळालेल्या माहितीनुसार, देवेश मिश्रा (वय 22, रा. फुरसुंगी, पुणे) असे मृत तरुणाचे नाव आहे. देवेश हा शनिवारी रात्री आपल्या चार मित्रांसोबत भोर तालुक्यातील नीरा देवघर धरण परिसरातील वेणपुरी येथे फिरण्यासाठी आणि मुक्कामासाठी गेला होता. दिवसभर पर्यटनाचा आनंद घेतल्यानंतर सर्व मित्रांनी तेथेच मुक्काम केला.

रविवारी पहाटे सहा ते साडेसहा वाजण्याच्या सुमारास मित्रांचा समूह धरण परिसरात फिरण्यासाठी बाहेर पडला. यावेळी देवेशने अंघोळ आणि पोहण्यासाठी धरणाच्या बॅकवॉटरमध्ये उतरण्याचा निर्णय घेतला. सुरुवातीला सर्व काही सुरळीत होते; मात्र काही क्षणांतच त्याचा पाण्यातील तोल गेला आणि तो खोल पाण्यात ओढला गेला. 

पोहण्याचा प्रयत्न ठरला अखेरचा

देवेश बुडत असल्याचे लक्षात येताच त्याच्या मित्रांनी आरडाओरडा करत त्याला वाचविण्याचा प्रयत्न केला. मात्र, पाण्याचा अंदाज न आल्याने आणि परिसरातील खोली अधिक असल्याने त्याला वेळेत बाहेर काढणे शक्य झाले नाही. स्थानिक नागरिक आणि बचाव पथकाला याबाबत माहिती देण्यात आली. त्यानंतर शोधमोहीम राबवून देवेशला बाहेर काढण्यात आले; मात्र तोपर्यंत उशीर झाला होता.

या घटनेनंतर देवेशच्या मित्रांनी त्याच्या कुटुंबीयांना संपर्क साधला. सुरुवातीला "देवेशचा छोटा अपघात झाला आहे" असे सांगण्यात आले. मात्र, प्रत्यक्षात त्याचा मृत्यू झाल्याचे समजताच आई-वडिलांच्या पायाखालची जमीन सरकली. काही क्षणांतच आनंदाच्या सहलीचे दुःखद शोकांतिकेत रूपांतर झाले.  

पर्यटनस्थळी सुरक्षिततेचा प्रश्न पुन्हा ऐरणीवर

नीरा देवघर धरण परिसर हा पर्यटकांचे आकर्षण मानला जातो. विशेषतः सुट्टीच्या दिवशी मोठ्या प्रमाणावर युवक आणि पर्यटक येथे भेट देतात. मात्र, बॅकवॉटर भागातील खोल पाणी आणि सुरक्षेच्या मर्यादित सुविधा यामुळे अशा दुर्घटना वारंवार घडत असल्याची बाब समोर येत आहे.

देवेश मिश्रा यांच्या निधनामुळे फुरसुंगी परिसरात शोककळा पसरली असून, धरण परिसरात पर्यटनासाठी जाणाऱ्या नागरिकांनी आणि युवकांनी पाण्यात उतरताना अत्यंत सावधगिरी बाळगावी, असे आवाहन प्रशासनाकडून करण्यात येत आहे