कुमशेत परिसरात ढगफुटी सदृश्य पाऊस; शेतपिकांसह घरांचे मोठे नुकसान, नागरिकांचे जनजीवन विस्कळीत

अवघ्या अर्ध्या तासात मुसळधार पावसाचा तडाखा; ओढे-नाले दुथडी भरून वाहिले, आदिवासी कुटुंबांचे मोठे आर्थिक नुकसान

 जुन्नर तालुक्यातील कुमशेत आणि परिसराला सोमवारी (22 जून) दुपारी ढगफुटी सदृश्य मुसळधार पावसाने अक्षरशः झोडपून काढले. अवघ्या अर्ध्या तासात झालेल्या अतिवृष्टीमुळे परिसरातील ओढे-नाले दुथडी भरून वाहू लागले, तर अनेक ठिकाणी घरांमध्ये पाणी शिरल्याने नागरिकांची मोठी गैरसोय झाली. या अचानक आलेल्या पावसामुळे शेतपिकांचे मोठे नुकसान झाले असून स्थानिक आदिवासी कुटुंबांनाही मोठा आर्थिक फटका बसला आहे.  

अर्ध्या तासाच्या पावसाने निर्माण केली पूरसदृश्य परिस्थिती

दुपारी सुमारे दोन वाजण्याच्या सुमारास कुमशेत परिसरात अचानक काळे ढग दाटून आले आणि काही क्षणांतच मुसळधार पावसाला सुरुवात झाली. जवळपास अर्धा तास सुरू असलेल्या या पावसाचा जोर इतका प्रचंड होता की परिसरातील लहान-मोठे ओढे, नाले आणि पाण्याचे प्रवाह क्षणार्धात भरून वाहू लागले.

रस्त्यांवरून मोठ्या प्रमाणात पाणी वाहत असल्याने अनेक ठिकाणी पूरसदृश्य परिस्थिती निर्माण झाली. सर्वत्र पाणीच पाणी झाल्याने नागरिकांची धावपळ उडाली. काही भागांमध्ये वाहतुकीवरही परिणाम झाल्याचे स्थानिकांनी सांगितले.

ठाकरवाडी आणि पांगरीमाथा परिसराला सर्वाधिक फटका

कुमशेत गावासह ठाकरवाडी आणि पांगरीमाथा परिसरात या पावसाचा सर्वाधिक परिणाम जाणवला. मुसळधार पावसामुळे अनेक घरांमध्ये पाणी शिरले. घरातील जीवनावश्यक वस्तू आणि धान्याचेही नुकसान झाल्याची माहिती समोर आली आहे.

विशेषतः ठाकर समाजातील कुटुंबांना मोठा फटका बसला आहे. स्वयंपाकासाठी आणि इंधनासाठी गोळा करून ठेवलेली लाकडे पाण्याच्या प्रवाहात वाहून गेली. त्यामुळे आधीच आर्थिक अडचणींचा सामना करणाऱ्या आदिवासी कुटुंबांवर नव्या संकटाचे सावट निर्माण झाले आहे.  

टोमॅटो, मका, ऊस आणि भाजीपाला पिकांचे नुकसान

या भागात मोठ्या प्रमाणावर टोमॅटो, मका, ऊस तसेच विविध भाजीपाला पिकांची लागवड केली जाते. अचानक झालेल्या अतिवृष्टीमुळे अनेक शेतांमध्ये पाणी साचले असून पिकांचे मोठ्या प्रमाणात नुकसान झाल्याचा प्राथमिक अंदाज व्यक्त केला जात आहे.

शेतकऱ्यांनी नुकतीच लागवड केलेली काही पिके पाण्याखाली गेली असून शेतीमालाचेही नुकसान झाले आहे. त्यामुळे आधीच हवामानाच्या अनिश्चिततेमुळे चिंतेत असलेल्या शेतकऱ्यांच्या अडचणीत आणखी भर पडली आहे.   

पंचनाम्याची मागणी; प्रशासनाकडून पाहणीची अपेक्षा

नुकसानग्रस्त नागरिक आणि शेतकऱ्यांनी प्रशासनाने तातडीने पंचनामे करून नुकसानभरपाई द्यावी, अशी मागणी केली आहे. स्थानिक लोकप्रतिनिधी आणि महसूल विभागाच्या अधिकाऱ्यांनी परिस्थितीची पाहणी करून मदतकार्य सुरू करावे, अशी अपेक्षाही व्यक्त केली जात आहे.

अचानक झालेल्या या ढगफुटी सदृश्य पावसाने कुमशेत परिसरातील जनजीवन विस्कळीत केले असून, पुढील काही दिवस हवामानाचा अंदाज लक्षात घेऊन नागरिकांनी सतर्क राहावे, असे आवाहन प्रशासनाकडून करण्यात येत आहे.